СЁР (Martes martes ; зуч сямен куница лесная), лулосъёслэн сьось лёгетысьтызы сёр динь выжыысь йол нонись пойшур. Мугорызлэн кузьдалаез 50 см-озь, секталаез 1,4 кг-озь. Гонэз курень, чыртыяз вань гадяз сюбегаса васькись чуж пусэз. Улэ Европалэн, шунды пуксён пал Сибирьлэн, Покчи Азилэн, Иранлэн тэлё но нюлэсо-нюлэстэм чошкыт интыосазы, со сяна Кавказ гурезьёслэн тэльёсаз. Удмурт элькунын пумиське вань ёросъёсын. Чемгес улэ тэльёсын, трос вуж гырко писпуосын интыосты яратэ. Тросгес ветлэ уин но жомо-югдо дыръя, писпуысь писпуэ тэтчаса но писпуысь музъем вылэ васькаса. Чемгес сие шыр выллем йырйиськись выжыысь лулосъёсты, озьы ик коньыосты, урдоосты, портэм тылобурдоосты, нымы-кибыосты, тэль емышъёсты. Туж яратэ чечыез, соин муш каръёсты тарка. Огпол ваемаз 2 – 8 синтэм пиосыз вордско (чемысь 3 – 5). Удмурт элькунын шер пумиське, соин ик бырон калэ вуэм лулосъёс полы пыртэмын. Дуно куо пойшур. Пойшуран онерын нырысети интыосын сылэ. Лыдзэ будэтон вылысь, лицензияя гинэ кутылыны лэземын.