Перма пќйшур стиль,

перма калыкъёс, туала комиослэн но удмуртъёслэн вашкалаоссы – пќлын вќлмем художественной стиль. П. п. с.-лэн вашкала праобразъёсыз скифо-сарматской пќйшур стильын адњиське. П. п. с.-лэн сяськаян вакытэз ломоватовской археологи лулчеберет дыръя 6–8-тћ дауръёсы вал. Языческой жрецъёс понна ыргон суретъёслэсь бычыос выллем кисьтон тросгес пумиське вал – чудской образокъёс шуонъёс. Тужгес но яратоно образъёс – кенњалиос, адямиос-тылобурдоос, адямиос-гондыръёс, куакаос. Со аспќртэмлыко лэсьтэмъёслэн кивалтэт значенизы вал, соос утетъёс (оберегъёс) вал. П. п. с.-лэн стилизовать карем мотивъёсыз каллен-каллен удмуртъёслэн орнаментсылэн пужыоссылы пќрмизы, нош значенизы сыџе ик кылиз. 18-тћ дауре – 19-тћ даурлэн кутсконаз П. п. с.-лэн традициосыз удмурт культовой фигураос лэсьтонын адњисько. 1980-тћ аръёслэн пумысенызы Удмуртиысь егит суредасьёс-авангардистъёс П. п. с.-лэсь образъёссэ асьсэ ужъёсазы выльысь улњыто.