НАРДЫ (Meles meles ; зуч сямен барсук), лулосъёслэн сьось лёгетысьтызы сёр динь выжыысь йол нонись пойшур. Нарды выжыын одиг портэм гинэ луэ. Мугорызлэн кузьдалаез 60 – 90 см, секталаез 10 – 16 кг, сизьыл кой люкам бераз 30 кг-озь. Тыбыраз но кот урдэсъёсаз гонэз азвесьпыръем-пурысь, кот улаз сьодалэс. Йырызлэн урдэсъёсаз пеймыт чуръёсыз вань. Европаын (тундраез лыдэ басьтытэк), Уйпал, Шор, Шунды пуксён пал Азиын улэ. Удмурт элькунын пумиське вань ёросъёсын писпу куако интыосын. Вулы матысь тэльын, нюк бамысь мур кушето гу карын улэ. Толэз колыса ортчытэ. Одиг ваемаз 2 – 6 синтэм пиосыз вордско. Сие кой нумыръёсты, шыр выллем йырйись лулосъёсты, музъемын-вуын улисьёсты, кензалиосты, тылобурдоосты. Куэз дуно овол, койыз калык эмъяськон удысын кутиське. Кутылыны лицензияя гинэ яра.