МЫЙ (Castor fiber ; зуч сямен бобр обыкновенный), лулосъёслэн йырйиськись лёгетысьтызы мый динь выжыысь йол нонись пойшур. Мугорызлэн кузьдалаез 130 см-озь, секталаез 30 кг-озь. Быжыз пачкес, паськыт, кузьдалаез 30 см-озь, сюрмем семо. Гонэз кузь, небыт, нап мамыко, югыт куреньысен сьодозь. Бер пыдъёсаз уян дыжъёсыз вань. Пумиське Евразилэн нюлэсо, нюлэсо-нюлэстэм чошкыт, нюлэстэм чошкыт интыосаз. Удмурт шаерын 19 даур пуме дуно куэз понна быдтэмын вал. Выльысь М. ваемын вал 1947 арын. Али пумиське элькунлэн вань ёросъёсаз. Тэль шуръёслэн но тыослэн ярдуръёсаз гудэ ву пушкы потись гу яке, улвайёслэсь, корам писпуослэсь сумедэн юнматыса, корка кар лэсьтэ. Пичи шуръёсы тыметъёс кылдытэ. Инвожотолэзе вордисько 3 - 6 (чемгес 2 - 4) пиосыз. Улэ ас выжыеныз (мойы куз М.-ёс, таяз аре но чемысь кылем аре вордиськем пиосыз). Гужем сие турын-куаръёсты и коня ке бадьпу но пипу вайёсты, толалтэ - писпу но куак вайёсты. М.-ез кутыло дуно куэз но "мыйлэн виятэмез" понна (зуч сямен "бобровая струя") – зын поттись безлэн тырметэз.