ЕНОТ ПУНЫ (Nyctereute procionoides ; зуч сямен енотовидная собака) лулосъёслэн сьось лёгетысьтызы кион динь выжыысь йол нонись пойшур. Е. п. выжыын одиг портэм гинэ луэ. Мугорызлэн кузьдалаез 80 см-озь, быжызлэн 25 см-озь. Мугорыз лапег, пыдъёсыз вакчиесь. Йырызлэн урдэсъёсаз гонэз кузьгес. Гонэз кырсь-курень. Пумиське Шунды жужан пал Азиын. Удмурт элькунэ ваемын 1954 арын. Али улэ вань ёросъёсын, чемгес пумиське шур дурысь тэлъёсын, шур, ты, нюр дурысь куакъёсын. Музъемез лымы шобыртэм бере, южтолэзьлэн шорозяз нюк бамалэ лэсьтэм гу караз жыныё-урдсо изе. Куазь шунытаку, карысьтыз пота. Мумы Е. п.-лэн 3 – 16 синтэм кучапиез вордске. Сие шыр выллем йырйиськись лулосъёсты, музъемын-вуын улисьёсты, нымы-кибыосты, чорыгъёсты, тэль емышъёсты, кензалиосты. Пойшураны потэ жомо-югдо дыръя но уин. Кузэ кулэ каремъя, пойшуран онерын нырысети интыосын сылэ. Быгатэ изъян вайыны пойшуран онерлы: тылобурдо каръёсты тарка, ягын улись но вуын уясь тылобурдоослэсь пиоссэс сие.