Алтави Анатолий Павлович Рябов профессоронть 104-це иень чачома чинтень

Н.Баюшкин,
наукань кандидат

Минек тевемек, штобу а стувтомс кадозь эрзянь лемтнень, конат ульнесть минек историясо, велявтомс сынст ломантненень культуранть кепедемасо.

Неть ломантне те шкас минек туртов свал улить примерэкс, нравственной нежекс эрзянь народонть национальной сознаниянзо одов чачомасонть. Истямо эрзянь покш ломанекс ульнесь А.П.Рябов профессорось.

Сон чачсь 16-це апрелень чистэ 1894-це иестэ Мордовиянь Ицялонь районсо Лaмбаське велесэ. Веленть школанть прядовомадо мейле тетянзо-аванзо кучизь сонзэ тонавтнеме Починковонь духовной училищав, мейле тонавтни Нижегородской духовной семинариясо. Тетянзо куломадо мейле кадсы семинариясо тонавтнеманть, но сёксня 1912-це иестэ пек парсте максы экзамент Нежинской педагогической институтонь филологической факультетс, конань пек парсте прядсы 1916-це иестэ. Тонавтнемстэ сон кармась содамост латинэнь, англиянь, финнэнь ды эстониянь кельтнень.

4 иеть А.П.Рябов важодсь тонавтыцякс семинариясо, мейле – Нижегородской губерниясо народонь образованиянь отделсэ сотрудникекс. Тесэ сон бажи теемс школасо тонавтнеманть эрзя ды мокша кельтнесэ. Активной профессиональной роботазо эрзятненень ды мокшотненень национальной школа панжомо коряс неизь РСФСР-энь Наркомпросонь прогрессивной сотрдниктне, секскак 1924-це иестэ сонзэ тердить Московов важодеме методистэкс Совнацменэнь Центральной Мордовиянь бюров.

Московсо свал ульнесь покш мокшэрзянь диаспора. Тесэ мокшэрзятне муильть кекшема тарка вачочиденть, революциядо мейле кунцематнеде, свал весе кортасть эсь ютковаст тиринь кельсэ.

1923-це иестэ мокшэрзятне панжить “Сыргозема“ вейсэндявкс, покш тарка косо явозель морамо коллективентень, конань прявтокс ульнесь А.П. Рябов. Те хоронть лемс Всесоюзной радиосо морамодо мейле масторонть эрьва пельде сыльть пек ламо сёрмат, конатнесэ ломантне евтнесть покш ёжомарямодост эсень кельсэ искусстванть марто вастомадонть, вельть седейсэ моразь эрзянь моротнеде.

Морамотнесэ сеетьстэ ульнесть покш ломантькак, примеркс, искусствасо реформаторось В.Э.Мейерхoльд, кона ульнесь “чавозь” эрзя моротнень мазычисэ. Сон пек вечкилинзе А.П.Рябовонь хоронть эрзянь моротнень.

1926-це иестэ панжови мордовской клуб Марьиной Рощасо, прявтокс путозель А.П.Рябов. Те клубось теевсь эрзянь келень, литературанть ды культурань центракс. Свал инжекс ульнесть тесэ А.Моро, Н.Эркай, А.Лукьянов, Я.Григошин, Ф.Чесноков ды ламо лия сёрмадыцят. А.П.Рябов свал вансь од ломантнень касомаст мельга.

Зярдо теевсь Мордовиянь автономиясь ды панжовсь Саранскойсэ пединститут, А.П.Рябов сы Саранскоев, сестэ сон кадызе эсензэ “эйкакшонзо” - мордовской хоронть уш се шкане содавикс эрзя морыцянтень Илларион Яушевнень.

А.П. Рябовонь, кода лингвистэнтень, покш вий макссть вастоматне келень покш содыцятнень Д.В.Бубрихень, Ф.Ф.Советкинэнь ды народонь просветителенть М.Е.Евсевьевень марто.

Сон покш тев тейсь эрзянь ды мокшонь учительтнень 1-це ды 2-це промкстнэнь анокстамосонть ды ютавтомасонть 1924-1925-це иетнестэ. Неть иетнестэ А.П.Рябов аноксты эрзянь школань учебникть. 1926-1927-це иетнестэ ульнесь сон эрзянь келень экспедициясо Лувне ды Кеченьбуе велетнесэ. 1926-це иестэ сон кармась тонавтнеме Востоконь народтнэнь НИИ-нь аспирантурасо. Тосо сон тееви эрзянь ды мокшонь келень покш содыцякс. А.П.Рябовось аноксты эрзянь келень юоронть, ванькставты эрзянь келенть руз валтнэнь эйстэ.

1934-це иестэ эрзянь келень васенце профессоронть А.П.Рябовонь тердизь Мордовской пединститутс мокшонь-эрзянь келень кафедранть прявтокс. А.П.Рябов профессоронть покш питнезэ сеньсэ, што сон васенцеде сёрмадызе ды ловнызе неень шкань эрзянь келень курсонть, методиканть ды сонзэ историянзо.

Мордовской пединститутсо А.П.Рябовонть перька пурназельть учёнойтне (Антонов, Смирнов, Васильев, Макаров) ды студентнэ (Горбунов, Сигимова, Смолькина, Назаров).

“Вельть покш важодемась“ мокшэрзянь культуранть кепедемасонть НКВД-нтень не-явсь берянь тевкс. 1937-це иень 5-це июньстэ ульнесь максозь 4 № ордер А.П.Рябовонь кудосо вешнеманть коряс. Сонзэ пекстызь, ёвтазь“ мокшэрзян ятокс”. Пекстазель сонзэ низэяк, тонавтыцясь Прасковья Фадеевна, а цёраст Ричард ертозель ушов.

1937-це иень 17-це декабрень чистэнть чумондомасонть мерезель, што сонзэ сиведизь финнэнь ды эстононь шпионтнэ, Д.В Бубрих ды Марк. Нама, А.П.Рябов кодамояк “антисоветской” тевсэ арасель, ялатеке 1938 це иень 23 це майстэ ледезель.Калмамо тарказо апак евта те шкамс.

Омбоцеде чавизь сонзэ кода “народонь враг” 1952-це иень келень конференциясо, кона алтазель келень коряс “Сталинэнь” роботатненень, истя жо ледезельть Мордовиянь ламо лия покш ломанть. СССР-нь Верховной Судонь Военной коллегиясь 28-це ноябрясто 1956-це иестэ полавтызе Верховной Судонь коллегиянь приговоронзо, кона ульнесь теезь А.П.Рябовонь коряс, секскак тевесь лоткавтозель преступлениянть арасьчинзэ коряс.

А.П.Рябов профессоронть ульнесь нурькине эрямозо, ялатеке сон виензэ максызе мокшэрзянь ломантнень туртов. Сон сёрмадсь малав 30 ловномат эрзянь ды мокшонь кельтнень коряс, конатне кандыть те шкас покш лезэ. Минь сюконятано те покш Эрзянь ломанентень, кирдтяно сонзэ мельсэнек - превсэнек.

Кадык А.П.Рябовнень Эстониянь масторсо алтазь Эрзянь Келень читне кармить улеме, мельспарокс, теевить традициякс 1998-це иестэ саезь ды сонзэ лемензэ кундамс.

1925-це иень Eesti Kirjandus 5-це номерсэ лиссь Тарту университетэнь уралонь кельтнень Юлиус Марк профессоронть сермадовксозо "Черемистнень, вотякнень зырянтнень ды мокшерзятнень касомадост зярыя ёнкст 1917-це иетнеде мейле", иллюстрациякс максозель текст эрзянь ловномасто "Якстере сокиця". Те ульнесь эрзянь кельсэ васенце сёрмадовкс Эстониянь масторсо. Арсеви, те эрзянь сёрмадовксось понгсь Юлиус Марк профессоронтень А.П.Рябовонь трокс, конань чумондысь, теке шпиононь, Эстониянь лезкс. Истямокс ульнесь А.П.Рябов профессоронть чумозо: сон кучсь омбо масторов стратегиянь покш тев - конёв лангсо эрзянь сараст.