XII suvõülikuul´ peeti 4.-6. põimukuu pääväl
parhilladsõn Tartu maakunnan Mehikuurman, mia om kah aoluuline Võromaa. Ülikooli
pääkõrraldaja oll´ Agu Vissel, majandusõ ni organisiirmise poolõ päält
avitiq tedä Triinu Ojar, Jan Rahman ja vahtsõ inemisenä võru asja ajama
naanu Urmas Kalla, kiä om esiq Mehikuurmast peri. Latsikoolitust juht´ Nele
Reimann.
Ettekandit peeti Mehikuurma lähembä ümbrüse elost-olost ja inemiisist, a
kaeti võru asja pääle ka laembalt. Kynõldi nii võro keelest ja kultuurist
ku ka tõisist soomõ-ugri kiilist ja kultuurõst. Uma praktiline oppus oll´
kah: tuu vei läbi Pulga Jaan teemal "Kuis kirotada kallimbalõ
kirja". Võro keele tunn´ oll´ ette nätt ka latsilõ.
Katõl õdagul mängiti maaha kolm näütemängu: Kuldri kooliteatri Parhilla
tekk´ näütemängu eidest ja taadist, Talliina Võro Selts´ mänge Kõivu
Andsu näütemängu "Viiekõistõ rüänurmõn" ja Kalev Kudu lavast´
Kauksi Ülle näütemängu "Ah tsusku külh, olõs õkva likõs
saanuq". Puul´päävä õdagu hõigati vällä ka tõsõ võrukiilside näütemängõ
võistlusõ võitjaq: edimädse kotusõ sai Artur Heinlo näütemäng
"Konstaabli Pitsu", tõist-kolmandat kotust jäiq jagama Voldemar
Raidaru "Tarvassaarõ rahvas" ja Ants Kõivu näütemäng "4 vai
5", mia om õigustüldäq tuusama, mia "Viiekõistõ rüänurmõngi".
Näütemänguvõistlusõ kolmanda kotussõ sai Aili Kruusel ja ergutusauhind
anti Aili Rüütli-Naruskilõ. Õdaguisil luulõõdakil loiq ummi luulõtuisi
Bernhard Viiding, Veiko Märka, Contra, Wimberg jt. Sai kullõlda ka Talliina Võrokõisi
Seldsi laulukoori "Liiso" laulmist. Huviliisile tetti katõ laivaga
Peipsi pääl sõitu ni koolimaja iin müüdi värskit suidsulatikat.
Tulõvaastanõ XIII Kaika suvõülikuul´ peedäs Pikäkannun Lasva vallan.
Mariko Faster
Fenno-Ugria Infoleht, 2000, nr 5 (25)
© SURI